السادة المرتشون بقلم الشاعر طارق السيد

السادة المرتشون
إحنا الفساد إحنا السواد
إحنا إللي بناكل في العباد
كدا هم هم
هنقول خطبة ماقالها نيرون
ولا قالها في يوم حتى نابليون
في حرب وسلم
هنزعق قوي كدا زي الغول
ونجعر قوي قوي ونقول
أخي المواطن إتفلق أو إتحرق
أو إغلي مية وإتسلق
دا مش مهم
إطلع فوق جبل إندلق
أو أعقد حبل وإتشنق
دا مش مهم
وإن قلت الأه أه ياويلك
صبحك يصبح عز ليلك
تتقلي وتتشوي
أو حتى يمكن تتحشي
ترفع حواجبك تنتشي
من حشو بطنك بالإشي
وبرضو نقول لك مش مهم
تعيش في غم تشيل في هم
مش مهم
إنزف في دم إشرب في سم
مش مهم
نبيع شرفنا ونرتشي
بنخاف صحيح مانختشي
نلبس جونيلة مشمشي
أو حتى بلوزة شفتشي
دا مش مهم
أخي المواطن في الختام
طاوعنا وإسمع الكلام
وإلا نجيلك في المنام
شايلين على كتافنا الإشي
بقلم طارق السيد