جوة الدواير بقلم طارق السيد

جوة الدواير
كله حاير كله داير
كله تايه في الدواير
إللي غازل توبه خيش
وإللي توبه من الحراير
واللي خابز فيها عيش
يجي ياكل مايلاقيش
واللي عاش زي الديوك
عاش ونافش فيها ريش
كله ساير كله داير
كله تايه في الدواير
ياللي جاير ياللي ظالم
ع الباغي تدور الدواير
ياللي معلق المشانق
للي مزنوق في المزانق
بكرة تترد المظالم
واللي فاتح يبقى غامق
ياللي ملياك العيوب
ياللي ركباك الذنوب
توب لربك يلا توب
كفاية توهة في الدروب
بقلم طارق السيد