إبنى وإبنك بقلم طارق السيد

إبنى وإبنك
إبني وعمر وازرع تاني
تبقى البنا والبستاني
علشان يكبر إبنى وابنك
يلقوا ميراثهم كدي وكدك
يلقوا الشمعة فى عز الضلمة
يلقوا الحق فى ضهره الكلمة
يلقوا عمار... يلقوا خضار
يلقوا الليل بيزاحمه نهار
يلقوا بيوتهم وسط جنينة
جنينه بسور حواليه الزينة
وسرب حمام وغصن زتون
وشمس بتشرق مهما يكون
ونجوم بتلالي فى قلب الليل
وفلوكة بتجرى تشق النيل
وشراع تتمسح فيه الريح
وتبوسه فى خده بدون تجريح
وتحت النخل أبو طلع جميل
يغنى الناى يغزل مواويل
مواويله تخلي النخل يميل
ونسايم صيف تبقى المراسيل
ياطيور زقزقي إوعي تفرقي بين صبح وليل
إفرحي واضحكي رفرفي بجناحك هزي الديل
وإنتي ياشمس فى وقت غروبك
غوصي فى البحر يامحلى هروبك
هفضل أعمر فيكي وأبني
يادنيا افتحي دراعاتك لابني
وريله يادنيا ألوان طيفك
دفي شتاكي ولطفي صيفك
إبني لإبنك وأبني لإبني
إيدي فى ايدك اوعى تسيبني
نوصل بيهم بر أمان
مايدوقوا فى يوم أبدا حرمان
قصر كلامنا يلاقوا أحلامنا أحلام تتحقق واقع ليهم
هما كمان يقدروا يحلموا أحلام لولادهم تبدأ بيهم
بقلم طارق السيد