الحب بعد الجواز كلمات الشاعر طارق السيد

الحب بعد الزواج
في عيد الحب نجيب دباديب
هدية وصل حبيب لحبيب
وبعد جوازنا بكام سنه حب 
هات ياخناق وسيب وانا أسيب
هو يقول ياكابوس كان حلمي
وهى تقول آه ياخيبة أملي
هو يقول طب فين الود
وفين الورد إللى على الخد
وفين الضحكة الرايقه الصافيه
ولمسة أيدك الدافيه الشافيه
حاجه تحير كله إتغير
بعد جوازنا لشد وصد
وهى تقوله ماتسأل نفسك
قبل ماتنطق باللي فى نفسك
كنت تملي بتسهر بره
سايبني لوحدي مع الدباديب
كنت أسهر وحدي أستناك
وكل شويه أزور شباك
وأدعي تعود لي مهما تغيب
ولما بترجع ترمي سلام
وبدون ولا كلمة تخش تنام
فين وديت الكلمة الحلوة
وفين الهمسة وفين الغنوة
فين الحب فين الحنية
طب فين عشق عنيك لعنيا
راجع نفسك وإرجع ليا
إرجع تاني غني الأغنية
وعهد عليا ياروح الروح
أشيلك جوه فى نن عنيا
بقلم طارق السيد